14 avgust kuni Markaziy Osiyoning bir nechta davlatlarida elektr energiyasi bilan bog‘liq jiddiy uzilishlar kuzatildi. Bishkek, Olmaota, Dushanbe va boshqa hududlarda aholi elektr ta’minotidagi muammolar haqida xabar berdi.
Qirg‘iziston
Bishkek aholisi 14 avgust kuni kunduz kuni shaharning turli hududlarida elektr energiyasi o‘chib qolgani va uzilishlar kuzatilgani haqida ommaviy ravishda xabar bera boshladi.
Shikoyatlar poytaxt markazi, «Alamedin-1» mavzesi, Asia Mall hududi, Energetiklar shaharchasi va boshqa hududlardan kelib tushgan. Issiqko‘l viloyatida ham elektr ta’minotidagi uzilishlar haqida xabarlar tarqaldi.
Qirg‘iziston Milliy elektr tarmog‘i elektr ta’minotidagi uzilishlar sabablari bo‘yicha izoh keyinroq berilishini ma’lum qilgan.
Qozog‘iston
Qozog‘istonda ham elektr ta’minotida muammolar yuzaga kelgan.
«Alatau Zharyq Company» AJ ma’lumotlariga ko‘ra, 14 avgust kuni soat 14:38 da L-5400, L-5300 va L-5320 yuqori kuchlanishli elektr uzatish liniyalarida avariyaviy o‘chish sodir bo‘lgan.
Natijada avariyaga qarshi avtomatika ishga tushgan va Olmaota hamda Olmaota viloyatidagi iste’molchilarning bir qismi elektr energiyasisiz qolgan.
O‘chirilgan yuklama hajmi qariyb 300 MVtni tashkil etgan. Elektr ta’minotidagi uzilishlar Olmaotaning to‘rtta tumani va Olmaota viloyatining 10 ta tumaniga ta’sir ko‘rsatgan.
Energetiklar elektr ta’minotini tiklash ishlarini boshlagan.
Tojikiston
Dushanbe va Tojikistonning boshqa hududlarida ham elektr energiyasi bilan bog‘liq uzilishlar haqida xabarlar paydo bo‘ldi.
Mahalliy ijtimoiy tarmoq foydalanuvchilarining ma’lumotlariga ko‘ra, ayrim hududlarda elektr energiyasi oldindan ogohlantirilmasdan o‘chirilgan.
Mintaqada bunday holat avval ham kuzatilgan
Bu Markaziy Osiyoda energiya tizimidagi ilk yirik uzilish emas.
2026 yil iyul oyida Bishkekning deyarli butun hududi va Chuy viloyatining bir qismi yuqori kuchlanishli elektr uzatish liniyalari o‘chishi sababli qariyb bir yarim soat elektr energiyasisiz qolgan edi. O‘shanda bunga 220 kV kuchlanishli liniyalardagi avariya va tizimli avtomatikaning ishga tushishi sabab bo‘lgan.
2022 yil yanvar oyida ham yirik energetik uzilish yuz bergan. O‘shanda Qozog‘iston, Qirg‘iziston va O‘zbekistonning ayrim hududlarida bir vaqtning o‘zida elektr ta’minotida uzilishlar kuzatilgan.
