O‘zbekiston fuqarolariga Qatardagi Ulta Beauty do‘konlarida ish taklif qilinmoqda. Vakansiyalar go‘zallik sohasi mutaxassislari hamda boshqaruv lavozimlarida ishlashni istaganlar uchun mo‘ljallangan. Oylik maosh lavozimga qarab 1450 dollardan 5500 dollargacha bo‘ladi.
Ishga joylashish imkoniyati haqida O‘zbekiston Migratsiya agentligi ma’lum qildi.
Qanday vakansiyalar mavjud?
Nomzodlarga quyidagi lavozimlar taklif etilmoqda:
kosmetika bo‘yicha konsultant — oyiga $1900;
brend bo‘yicha ta’lim mutaxassisi — $2750;
mijozlar bilan ishlash menejeri — $3850;
bo‘lim menejeri — $3050;
do‘kon boshqaruvchisi o‘rinbosari — $4000;
vizajist — $2300;
manikyur va pedikyur mutaxassisi — $1450;
teri parvarishi bo‘yicha mutaxassis — $2200;
do‘kon bosh menejeri — $5500;
vizual merchandayzing mutaxassisi — $1500.
Ish beruvchi nimalarni to‘laydi?
Ish beruvchi ishga joylashish va Qatarga ko‘chib borish bilan bog‘liq quyidagi xarajatlarni qoplaydi:
O‘zbekistondan Qatarga aviachipta;
ish vizasini rasmiylashtirish;
aeroportdan transfer;
tibbiy sug‘urta;
vatanga borib-kelish uchun aviachiptalar.
Biroq yashash, ovqatlanish hamda yashash joyidan ish joyiga borib-kelish transporti xarajatlarini xodimning o‘zi qoplaydi.
Nomzodlarga qo‘yiladigan talablar
Tanlovda ishtirok etish uchun nomzodlar quyidagi talablarga javob berishi kerak:
20 yoshdan katta bo‘lish;
kamida o‘rta ma’lumotga ega bo‘lish;
ingliz tilini erkin bilish;
tegishli sohada kamida 2 yillik ish tajribasiga ega bo‘lish.
Tanlovda erkaklar ham, ayollar ham ishtirok etishi mumkin.
Qanday ariza topshirish mumkin?
Tanlovda ishtirok etish uchun arizani 2026-yil 29-avgustgacha xorijda ishlash uchun vakansiyalar joylashtiriladigan rasmiy portal orqali topshirish mumkin.
Ariza topshirishdan oldin muayyan vakansiyaning shartlari va nomzodlarga qo‘yiladigan talablar bilan diqqat bilan tanishib chiqish tavsiya etiladi.
