Toshkentda ichki ishlar organlari xodimlari SPA salon niqobi ostida faoliyat yuritgan yashirin fohishaxonani fosh etdi. Tergov ma’lumotlariga ko‘ra, qizlar oddiy ish va’dasi bilan aldab olib kelingan, so‘ng ularning erkiga qarshi ushlab turilib, kaltaklangan va mijozlarga intim xizmatlar ko‘rsatishga majburlangan.
Huquqni muhofaza qiluvchi organlar ma’lum qilishicha, mazkur sxemani uch nafar ayol tashkil etgan. Ular massaj saloni niqobi ostida fohishaxona ochib, internetda ish e’lonlarini joylashtirgan va qizlarga ofitsiant hamda boshqa xizmat ko‘rsatish yo‘nalishlarida ish va’da qilgan.
Jabrlanuvchilardan biri Telegram orqali e’lonni ko‘rib murojaat qilganini aytdi. U manzilga borgach, yerto‘laga olib tushilgan va dastlab massajchi bo‘lib ishlashi aytilgan. Keyinchalik esa, uning so‘zlariga ko‘ra, mijozlar xonasiga yuborilib, massaj emas, boshqa intim xizmatlar talab qilingan.
Qizning aytishicha, rad javobi bergani uchun uni kaltaklashgan, sochidan sudrashgan, ovqatsiz qoldirishgan va majburan yana mijozlar huzuriga qaytarishgan. Uning so‘zlariga ko‘ra, kunlarning birida uni ketma-ket bir nechta erkakka xizmat ko‘rsatishga majbur qilishgan. Aynan shu paytda huquqni muhofaza qiluvchi organlar xodimlari binoga kirib kelgan.
Yana bir jabrlanuvchi talablarni bajarishdan bosh tortganidan so‘ng unga o‘ldirish bilan tahdid qilishganini, ustidan qaynoq suv quyish, sharmanda qilish va ko‘chaga tashlab yuborish bilan qo‘rqitishganini ma’lum qilgan. Shuningdek, gumonlanuvchilar unga vafot etgan taqdirda ham hech kim jasadini topa olmasligini aytgan.
Tezkor tadbir davomida ichki ishlar organlari xodimlari ushbu salonda yana yetti nafar qiz massaj xizmati niqobi ostida fohishalik bilan shug‘ullanayotganini aniqlagan.
Mazkur holat yuzasidan O‘zbekiston Respublikasi Jinoyat kodeksining 135-moddasi («Odam savdosi») bilan jinoyat ishi qo‘zg‘atilgan. Hozirda tergov harakatlari davom etmoqda, voqeaning barcha holatlari o‘rganilmoqda.
