Qashqadaryo viloyatida gaz quyish shoxobchasida fojia yuz berdi. MChS ma’lumotiga ko‘ra, 8-iyun kuni soat 13:50 da Qarshi tumani “Chaman” mahallasida joylashgan suyultirilgan gaz ballonlarini to‘ldirish punktida portlash sodir bo‘lgani haqida xabar kelib tushgan.
Voqea joyiga zudlik bilan beshta yong‘in-qutqaruv bo‘linmasi yuborilgan va ular bir necha daqiqada yetib kelgan. Yong‘in 14:05 da cheklangan, 14:55 da esa to‘liq o‘chirilgan.
Dastlabki ma’lumotlarga ko‘ra, portlash va undan keyingi yong‘in natijasida to‘rtta avtomobil — ikkita Cobalt va gaz tashishga mo‘ljallangan ikkita maxsus transport vositasi zarar ko‘rgan. Shuningdek, yoqilg‘i saqlash uchun mo‘ljallangan ikkita yer osti rezervuari ham jiddiy shikastlangan.
Eng og‘ir oqibat sifatida inson talafotlari qayd etildi. Hodisa natijasida olti kishi halok bo‘ldi, yana besh kishi turli darajadagi tan jarohatlari olib, shifoxonaga yotqizildi.
Portlash sabablarini aniqlash va oqibatlarni bartaraf etish ishlarini muvofiqlashtirish maqsadida O‘zbekiston Bosh vazir o‘rinbosari Achilbay Ramatov boshchiligida Hukumat komissiyasi tuzildi. Uning tarkibiga tegishli vazirlik va idoralar vakillari kiritildi.
Komissiyaga jabrlanganlarga yordam ko‘rsatish, voqea sabablarini aniqlash, zarar miqdorini baholash hamda bunday hodisalarning oldini olish bo‘yicha chora-tadbirlar ishlab chiqish topshirildi.
Hozirda gaz quyish shoxobchasi hududi o‘rab olingan va mutaxassislar nazorati ostida. Hodisa oqibatlarini bartaraf etish ishlari davom etmoqda.
