O‘zbekiston Respublikasi Oliy ta’lim, fan va innovatsiyalar vazirligi davlat oliy ta’lim muassasalarining magistraturasiga hujjatlarni onlayn qabul qilish boshlanganini ma’lum qildi. Arizalar 1-iyundan 30-iyulgacha qabul qilinadi.
Tanlovda ishtirok etish uchun bakalavr diplomi hamda chet tilini bilishni tasdiqlovchi amaldagi milliy yoki xalqaro sertifikat talab etiladi. IELTS (kamida 5,5 ball), TOEFL iBT (kamida 72 ball), shuningdek Vazirlar Mahkamasi huzuridagi Davlat test markazi tomonidan berilgan B2 va undan yuqori darajadagi sertifikatlar qabul qilinadi.
Ba’zi toifalar uchun til sertifikati talabi bekor qilinadi. Jumladan, prezident va davlat stipendiyalari sohiblari, davlat mukofotlari laureatlari, respublika olimpiadalari g‘oliblari, shuningdek tegishli hujjatlarga ega bo‘lgan ko‘rish, eshitish yoki nutqida nuqsoni bo‘lgan shaxslar bundan mustasno. Shuningdek, bakalavriatda xorijiy tilda tahsil olgan bitiruvchilar ham ushbu talabdan ozod etiladi.
Qabul jarayonida qo‘shimcha imtiyozlar ham mavjud: davlat oliy ta’lim muassasalarining kontrakt asosida magistraturaga kirayotgan ayollar har yili davlat tomonidan qo‘llab-quvvatlanadi. Grant asosidagi qabul esa 25-avgustgacha rasmiylashtiriladi.
