O‘zbekistonda shaxsiy foydalanish uchun olib kiriladigan smartfonlarni UzIMEI tizimida avtomatik ro‘yxatdan o‘tkazish tizimi joriy etildi. Bu yangilik Toshkent xalqaro aeroportida Bojxona qo‘mitasi o‘tkazgan press-tur davomida taqdim etildi.
Endi jarayon to‘liq raqamli shaklda amalga oshiriladi. Yo‘lovchi pasport ma’lumotlari va qurilmaning IMEI-kodini ybdweb.customs.uz sayti orqali kiritadi. Shundan so‘ng tizim ma’lumotlarni avtomatik tekshiradi, shaxsni tasdiqlash esa Face ID orqali amalga oshiriladi. Bojsiz olib kirish me’yorlariga rioya qilingan taqdirda, smartfon navbatlarsiz va bojxona xodimlariga murojaat qilmasdan UzIMEI tizimida avtomatik ro‘yxatdan o‘tkaziladi.
Bu funksiyaga elektron yo‘lovchi bojxona deklaratsiyasi orqali ham kirish mumkin: uni to‘g‘ridan-to‘g‘ri smartfondan yoki aeroportdagi infokiosklar orqali, hatto bagaj kutilayotgan vaqtda ham to‘ldirish imkoni bor. Ma’lumotlar kiritilgach, tizim qurilmani avtomatik ro‘yxatdan o‘tkazadi.
Bojxona qo‘mitasi ma’lumotlariga ko‘ra, yil boshidan buyon 180 mingdan ortiq yo‘lovchi bojxona deklaratsiyasini to‘ldirgan bo‘lib, ularning 85% dan ortig‘i telefon IMEI-kodlarini ko‘rsatgan. Yangi tizim bojxonada rasmiylashtirish vaqtini 85–90% ga qisqartirishi va jarayonni 1–2 daqiqagacha tushirishi kutilmoqda.
