YHXX boshlig‘i Sherzod Ibragimov ma’lum qilishicha, idoralararo ishchi guruh Yo‘l harakati qoidalarini buzganlar uchun javobgarlik choralarini kuchaytirish bo‘yicha takliflarni ishlab chiqib, Prezidentga taqdim etgan.
Tashabbuslar orasida yo‘l bezoriligi va boshqa qo‘pol qoidabuzarliklar uchun avtomobillarni musodara qilish yoki vaqtincha olib qo‘yish chorasini joriy etish mavjud. Shuningdek, transport vositasini boshqarishni voyaga yetmaganlarga topshirish, noqonuniy ko‘cha poygalarini tashkil etish va ularda ishtirok etish uchun alohida ma’muriy javobgarlik belgilash taklif qilinmoqda.
Bundan tashqari, haydovchilik guvohnomasiga ega bo‘lmagan yoki huquqidan mahrum etilgan shaxslar tomonidan xavfli qoidabuzarliklar sodir etilganda avtomobillarni musodara qilish yoki vaqtincha olib qo‘yish chorasini qo‘llash rejalashtirilmoqda. Mast holda transport vositasini boshqarganlar uchun esa 15 sutkagacha ma’muriy qamoq jazosini joriy etish taklif etilgan.
Yana bir tashabbus — qo‘pol qoidabuzarlik sodir etilganidan keyin bir yil davomida jarimalarni chegirma bilan to‘lash imkoniyatini bekor qilishdir.
SDBD rahbarining so‘zlariga ko‘ra, bunday choralarni kuchaytirish zarurati voyaga yetmaganlarga avtomobil berish va noqonuniy poygalar sabab yuz berayotgan, jumladan o‘lim bilan tugaydigan yo‘l-transport hodisalarining ko‘payishi bilan bog‘liq.
