25 iyundan boshlab O‘zbekistonda yilning eng issiq va qurg‘oqchil davri — 40 kunlik Chilla boshlanadi va 3 avgustgacha davom etadi. Ko‘p asrlik xalq an’analariga ko‘ra, bu davr “saratон” deb ham ataladi.
Sinoptiklar ma’lumotiga ko‘ra, bu yil Chilla boshlanishi anomal issiqning birinchi to‘lqini bilan to‘g‘ri kelmoqda. Iyun oxirida Eron hududlaridan Turkmaniston orqali issiq havo massalarining kuchli kirib kelishi kutilmoqda, bu esa mamlakat bo‘ylab haroratning keskin oshishiga olib keladi.
Aksariyat hududlarda havo harorati +40°C dan oshib, 40–42°C darajada saqlanadi. Shimoliy viloyatlar, janub va cho‘l hududlarida esa 43–45°C gacha ko‘tarilishi prognoz qilinmoqda. Ayrim hududlarda, jumladan Qizilqum cho‘lida avvalgi yillarda harorat 47°C gacha, janubiy hududlarda esa 49°C gacha yetgani qayd etilgan.
Shu munosabat bilan tibbiyot va qutqaruv xizmatlari fuqarolarni ehtiyot choralariga rioya qilishga chaqirmoqda. Kunning issiq vaqtida to‘g‘ridan-to‘g‘ri quyosh ostida bo‘lmaslik, bosh kiyimdan foydalanish, og‘ir va achchiq taomlarni cheklash, yetarli miqdorda suyuqlik — afzalroq suv yoki ko‘k choy ichish tavsiya etiladi. Konditsioner ishlatilganda esa sovuq havo oqimidan ehtiyot bo‘lish kerakligi ta’kidlanadi.
Ayniqsa, yurak-qon tomir kasalliklari mavjud bo‘lgan insonlarga alohida e’tibor qaratish zarur, chunki kuchli issiq davrida sog‘liq yomonlashishi xavfi sezilarli darajada oshadi.
