Raqobatni rivojlantirish va iste’molchilar huquqlarini himoya qilish qo‘mitasi O‘zbekistondagi koll-markazlar faoliyatini takomillashtirish bo‘yicha takliflarni Raqamli texnologiyalar vazirligiga yubordi. Bunga fuqarolarning band liniyalar, operator bilan uzoq kutish va qo‘ng‘iroqlar ulanish arafasida uzilib qolishi bo‘yicha ko‘plab shikoyatlari sabab bo‘lgan.
Idora ma’lumotlariga ko‘ra, aholi ko‘pincha elektr ta’minoti, gaz va suv ta’minoti hamda boshqa hayotiy muhim xizmatlarga tegishli tashkilotlarning qisqa raqamlariga murojaat qiladi. O‘tkazilgan tadqiqot natijalariga ko‘ra, ba’zi hollarda javob kutish vaqti 10–30 daqiqagacha yetadi, ko‘plab qo‘ng‘iroqlarga esa umuman javob berilmaydi.
Shuningdek, fuqarolar murojaatlari sezilarli darajada oshgani qayd etilgan: gaz ta’minoti bo‘yicha — 4,5 baravar, maishiy chiqindilarni olib chiqish bo‘yicha — 2,4 baravar, ichimlik suvi ta’minoti va qurilish xizmatlari bo‘yicha — 1,2 baravar.
Qo‘mita ta’kidlashicha, aholiga xizmat ko‘rsatuvchi aksariyat tashkilotlarning koll-markazlari faoliyati alohida normativ-huquqiy hujjat bilan tartibga solinmagan. Bu xizmat sifati pasayishiga, fuqarolarning ortiqcha vaqt sarflashiga va muammolarni tezkor hal etishga to‘sqinlik qilmoqda.
Vaziyatni yaxshilash uchun Qo‘mita barcha xizmat ko‘rsatuvchi tashkilotlarga Vazirlar Mahkamasining 790-son qarori bilan tasdiqlangan koll-markazlar samaradorligini baholash tartibini joriy etishni taklif qildi. Bundan tashqari, aniqlangan kamchiliklar uchun shaxsiy javobgarlik belgilash hamda baholash natijalarini ochiq e’lon qilish taklif etilmoqda.
