O‘zbekistonda kutilayotgan anomal issiq ob-havo sabab maktabgacha ta’lim tashkilotlari faoliyatini vaqtincha to‘xtatish masalasi ko‘rib chiqilmoqda. Ushbu chora bolalar salomatligini yuqori harorat ta’siridan himoya qilish maqsadida amalga oshirilishi mumkin.
Maktabgacha va maktab ta’limi vazirligi ma’lum qilishicha, mazkur masala hududiy hokimliklar, Sanitariya-epidemiologik qo‘mita va «O‘zgidromet» agentligi bilan birgalikda o‘rganilgan.
Vazirlik ma’lumotiga ko‘ra, bog‘chalarni vaqtincha yopish bo‘yicha yakuniy qaror har bir hududdagi ob-havo sharoitidan kelib chiqib mahalliy boshqaruv organlari tomonidan qabul qilinadi.
«Havo juda issiq bo‘lgan paytlarda maktabgacha ta’lim tashkilotlarini vaqtincha yopish ko‘zda tutilgan. Har bir hududiy bo‘linma vaziyatni o‘rganib, tegishli qaror qabul qiladi», — deyiladi vazirlik xabarida.
Avvalroq Qoraqalpog‘istonning ayrim hududlaridagi bog‘chalar kuchli issiq sabab 17–18 iyulgacha vaqtincha faoliyatini to‘xtatgani haqida xabar berilgandi.
«O‘zgidromet» prognoziga ko‘ra, 13–17 iyul kunlari O‘zbekiston hududiga janubdan juda issiq havo massalari kirib keladi. Ko‘pchilik hududlarda harorat +41…+43°C gacha, shimoliy, janubiy va cho‘l hududlarda esa +44…+46°C gacha ko‘tarilishi kutilmoqda.
Anomal issiq kunlarda bolalar xavfsizligi uchun ehtiyot choralariga rioya qilish va ob-havo bo‘yicha rasmiy tavsiyalarni kuzatib borish tavsiya etiladi.
