Toshkentda 33 yoshli xususiy klinika shifokori-uroloqiga nisbatan qo‘zg‘atilgan ma’muriy ish ko‘rib chiqildi. U amaliyotchi talaba qizlarga nisbatan jinsiy zo‘ravonlik (nojo‘ya xatti-harakatlar) sodir etganlikda ayblandi.
Ish materiallariga ko‘ra, birinchi holat 26 mart kuni Toshkent shahrining Almazor tumanida joylashgan xususiy klinikalardan birida sodir bo‘lgan. Ma’lumotlarga ko‘ra, shifokor amaliyot o‘tayotgan talaba qizga nisbatan haddan tashqari e’tibor qaratgan va xizmat xonasida unga intim munosabat taklif qilgan.
Ikkinchi holat 28 aprel kuni qayd etilgan. Bu safar shifokor o‘sha klinikada amaliyot o‘tayotgan boshqa bir talaba qizga nisbatan bosim o‘tkazgan. U qizga nisbatan o‘zining unga nisbatan his-tuyg‘ulari borligini aytib, uni sevishini va hatto turmush qurmoqchi ekanini bildirgan. Shuningdek, darslarga kelmagan kunlari uchun ijobiy baho qo‘yib berishni va’da qilgan.
Har ikki holat ham shifokorning xizmat xonasida sodir bo‘lgan.
Voqealardan so‘ng u klinikadan ishdan bo‘shatilgan. Jabrlanuvchi talaba qizlar sudga murojaat qilib, tegishli choralar ko‘rilishini so‘rashgan. Ulardan biri suhbat yozuvini (audioyozuv) ham taqdim etgan bo‘lib, unda baho qo‘yish va hissiy munosabatlarga oid gaplar qayd etilgan.
Sud majlisida ayblanuvchi qisman aybini tan olgan. U birinchi holatni rad etib, o‘zini tuhmat qilingan deb hisoblagan. Ikkinchi holat bo‘yicha esa qizga nisbatan his-tuyg‘ularini bildirganini tasdiqlagan, biroq jinsiy zo‘ravonlik niyati bo‘lmaganini ta’kidlagan.
Sud uning harakatlarini O‘zbekiston Respublikasi Ma’muriy javobgarlik to‘g‘risidagi kodeksining 41-1-moddasi (jinsiy zo‘ravonlik / nojo‘ya xatti-harakatlar) bo‘yicha kvalifikatsiya qildi. Natijada erkakka 5 sutka ma’muriy qamoq jazosi tayinlandi.
