Toshkentda elektr ta’minotidagi uzilishlarni real vaqt rejimida kuzatishga mo‘ljallangan yangi onlayn servis — svetanet.uz ishga tushirildi. Loyiha poytaxt aholisi uchun nafaqat elektr yo‘qligi haqida xabar berish, balki shaharning turli hududlaridagi dolzarb vaziyatni xarita orqali ko‘rish imkonini ham beradi.
Servis Telegram-bot @sveta_netbot orqali ishlaydi. Foydalanuvchilar shu bot orqali o‘z joylashuvini yuboradi. Agar elektr uzilishi haqida faqat bitta foydalanuvchidan signal kelib tushsa, xaritada belgi kulrang rangda ko‘rsatiladi. Agar 300 metr radiusda yana bir tasdiq qayd etilsa, uzilish tasdiqlangan deb hisoblanadi va hudud qizil rangga o‘tadi.
Ma’lumotlarga ko‘ra, yuborilgan xabarlar 3 soat o‘tgach avtomatik tarzda o‘chiriladi. Agar elektr ta’minoti avvalroq tiklansa, foydalanuvchi “Svet qaytdi” tugmasini bosishi mumkin — shundan so‘ng belgi darhol xaritadan yo‘qoladi.
Loyiha mualliflari ta’kidlashicha, servis notijorat bo‘lib, tashabbuskor guruh tomonidan sun’iy intellekt va bepul vositalardan foydalangan holda eksperimental loyiha sifatida yaratilgan.
Platforma aholiga elektr ta’minoti holatini tezroq tushunishga, uzilish mahalliymi yoki butun hududga ta’sir qilganmi — shuni aniqlashga yordam berishni maqsad qiladi.
