Toshkentda “Ming O‘rik” bekatidan Chilonzor buyum bozorigacha boradigan yangi metro liniyasi qurilishi loyihasi ko‘rib chiqilmoqda. Ushbu tashabbus O‘zbekiston Prezidenti huzurida taqdim etilgan bo‘lib, poytaxt metrosini rivojlantirish va yo‘lovchilarga xizmat ko‘rsatish sifatini yaxshilashga qaratilgan.
Ma’lumotlarga ko‘ra, shahar aholisi sonining o‘sishi, mehmonlar oqimining ko‘payishi va hududlarning kengayishi transport tizimiga yuklamani oshirmoqda. Shu sababli metro tarmog‘ini kengaytirish asosiy yechimlardan biri sifatida ko‘rilmoqda.
Loyiha ikki bosqichda amalga oshirilishi rejalashtirilgan: avval “Ming O‘rik – Janubiy vokzal” yo‘nalishini o‘rganish, keyin esa uni Chilonzor buyum bozorigacha uzaytirish. Shuningdek, metro tarmog‘ini kengaytirish va infratuzilmani modernizatsiya qilish ham ko‘zda tutilgan.
2030 yilga kelib, sutkalik yo‘lovchilar oqimini 1,8 million kishiga yetkazish, metro bekatlari sonini 79 taga, umumiy uzunligini esa 103 km ga yetkazish rejalashtirilgan. Poyezdlar harakati oralig‘ini 1,5–3 daqiqagacha qisqartirish ham maqsad qilingan.
Metro rivoji bo‘yicha takliflar ma’qullangan bo‘lib, tegishli tashkilotlarga loyihani yanada ishlab chiqish va tizimni modernizatsiya qilish bo‘yicha topshiriqlar berilgan.
