O‘zbekistonda “Yangi O‘zbekiston yoshlari – 2030” strategiyasi loyihasi taqdim etildi. U yoshlarni qo‘llab-quvvatlash, ta’limni rivojlantirish, tadbirkorlikni kengaytirish va bandlikni oshirishga qaratilgan. Hujjat 14–30 yoshdagi yoshlar uchun keng ko‘lamli chora-tadbirlarni nazarda tutadi.
Loyiha bo‘yicha, chet tillarini biladigan yoshlar davlat imtiyozlaridan foydalanish imkoniyatiga ega bo‘ladi. Xususan, B2 darajadagi xalqaro sertifikatga ega bo‘lganlarga xorijga chiqish pasportini rasmiylashtirishda 50 foiz chegirma berish rejalashtirilmoqda. C1 darajadagi yoshlar esa tadbirkorlikni boshlashda ayrim davlat xizmatlari va yig‘imlar uchun 50 foiz chegirmaga ega bo‘ladi.
Ta’lim va xalqaro dasturlarga alohida e’tibor qaratilgan. Strategiya doirasida Harvard University, Stanford University, Massachusetts Institute of Technology va London Business School kabi nufuzli oliy ta’lim muassasalari bilan hamkorlikda 20 ming yoshni o‘qitish rejalashtirilgan. Shuningdek, 100 ming yosh zamonaviy kasblar — IT, marketing, dizayn va boshqa talabgir yo‘nalishlarda tayyorlanadi.
Ta’lim infratuzilmasini rivojlantirish uchun chekka hududlarda o‘quv markazlari tashkil etishga 300 million so‘mgacha imtiyozli kreditlar ajratish taklif etilmoqda. Bunday markazlar uchun o‘qituvchilarning ijtimoiy va daromad solig‘i 1 foiz miqdorida belgilanadi.
Hujjatda yosh tadbirkorlarni qo‘llab-quvvatlash choralari ham ko‘zda tutilgan. 1 mingta istiqbolli biznes loyiha tanlab olinib, ularga 3 yil muddatga 500 bazaviy hisoblash miqdorigacha imtiyozli kreditlar berilishi rejalashtirilgan. Bundan tashqari, yosh tadbirkorlarning muhandislik tarmoqlariga ulanish xarajatlarining bir qismi davlat tomonidan qoplab beriladi.
Strategiyaning asosiy maqsadlari orasida har yili 600 ming yoshni ish bilan ta’minlash, yosh oilalarni ipoteka dasturlari orqali qo‘llab-quvvatlash, volontyorlik, sport va psixologik yordam tizimini rivojlantirish ham bor. Shuningdek, yoshlarni xalqaro amaliyotlar va hamkorlik dasturlariga jalb etish rejalashtirilgan, jumladan United Nations, World Bank va European Bank for Reconstruction and Development kabi tashkilotlar bilan hamkorlikda.
