Andijon viloyatidagi «Doʻstlik» bojxona postida bojxona xodimlari naqd valyutani noqonuniy olib chiqishga urinishning noodatiy holatini aniqladi.
Idora maʼlumotiga koʻra, 51 yoshli erkak qoʻshni davlatga chiqish maqsadida chegarani kesib oʻtishga urinib, yonida $35,6 ming naqd pul olib oʻtmoqchi boʻlgan. Pulni yashirish uchun u noodatiy usuldan foydalangan — barcha mablagʻni oʻz doʻppisining ichiga yashirgan.
Biroq urinish muvaffaqiyatsiz tugadi: bojxona tekshiruvi davomida yashirilgan naqd pul aniqlanib, olib qoʻyildi.
Amaldagi qoidalarga koʻra, Oʻzbekiston rezidentlari qoʻshimcha hujjatlarsiz chet el valyutasini 100 mln soʻmgacha (taxminan $8,3 ming) miqdorda olib chiqishlari mumkin.
Hodisa tekshiruv bosqichida toʻxtatilgan, barcha holatlar boʻyicha o‘rganish ishlari davom etmoqda.
