A-92 benzini narxi O‘zbekiston respublika tovar-xomashyo birjasida tarixiy maksimumga yetdi — bir tonnasi 13,9 million so‘m. Bu holat yoqilg‘i taklifining kamayishi va mintaqaviy yoqilg‘i bozoridagi umumiy taranglik fonida yuz berdi.
Iyun oyi boshidan beri ushbu turdagi benzinning birja narxi qariyb 11,8% ga, ya’ni taxminan 1,473 million so‘mga oshdi. Asosiy qimmatlashish oyining birinchi yarmida kuzatildi: bir necha kun ichida narx 12,476 million so‘mdan 13,788 million so‘mga ko‘tarildi.
Shu bilan birga, birjada taklif hajmi sezilarli darajada kamaydi. Iyun boshida savdolarda kuniga o‘rtacha 3 791 tonna benzin taklif qilingan bo‘lsa, 23-iyunga kelib bu ko‘rsatkich deyarli ikki baravar kamayib, 1 898 tonnani tashkil etdi. Oy oxiriga kelib hajm qisman tiklanib 3 123,2 tonnagacha yetgan bo‘lsa-da, bu narxlarning pasayishiga olib kelmadi.
Mutaxassislar narx oshishini Rossiya yoqilg‘i bozoridagi vaziyat bilan bog‘lamoqda: neftni qayta ishlash zavodlarida rejalashtirilmagan ta’mirlashlar sababli yuzaga kelgan taqchillik hamda Rossiyadan benzin eksportiga qo‘yilgan amaldagi taqiq bunga ta’sir qilgan.
