O‘zbekiston jaziramaning eng og‘ir bosqichiga kirib bormoqda. 19-iyul kuni O‘zgidromet prognoziga ko‘ra, mamlakat bo‘ylab ekstremal issiq, kuchli shamol va chang-to‘zonlar kuzatiladi. Ayrim hududlarda havo harorati hatto soyada ham +50°C ga yaqinlashishi mumkin.
E’tiborlisi, bundan bir kun avval respublika meteorologik kuzatuvlar tarixidagi eng issiq kunlardan birini boshdan kechirdi. Ba’zi joylarda termometrlar +49,7°C ni ko‘rsatdi. Vaziyat bundan ham og‘irlashishi mumkinmi? Sinoptiklar prognoziga ko‘ra, ayrim hududlarda — ha.
Mutaxassislar imkon qadar kunning eng issiq paytlarida tashqariga chiqmaslikni, uzoq vaqt to‘g‘ridan-to‘g‘ri quyosh ostida qolmaslikni va o‘z salomatligiga alohida e’tibor berishni tavsiya qilmoqda. Bu, ayniqsa, bolalar, keksalar va ochiq havoda ishlaydiganlar uchun muhim. Bugun ehtiyotkorlik har qachongidan ham zarur.
