13-iyul kuni Prezident Shavkat Mirziyoyev Toshkent — Bekobod yo‘nalishida yangi elektropoyezdning muntazam qatnoviga start berdi. Davlat rahbari ushbu yo‘nalishdagi ilk qatnovda shaxsan ishtirok etdi.
Olti vagonli elektropoyezd 586 yo‘lovchiga mo‘ljallangan bo‘lib, 120 km/soat tezlikda harakatlana oladi. Poyezdda yo‘lovchilar uchun barcha qulayliklar yaratilgan:
konditsioner va isitish tizimi;
Wi-Fi va USB-quvvatlagichlar;
yumshoq o‘rindiqlar;
elektron axborot tablolari;
videokuzatuv tizimi;
nogironligi bo‘lgan shaxslar uchun ko‘tarish moslamalari;
velosipedlar uchun maxsus joylar.
Uzunligi 192 km bo‘lgan ushbu yo‘nalish orqali kuniga qariyb 1 ming, yiliga esa 300 ming yo‘lovchiga xizmat ko‘rsatish rejalashtirilgan. Yangi elektropoyezd avtomobil yo‘llaridagi yuklamani kamaytirish va temir yo‘l transportini rivojlantirishga xizmat qiladi.
